The grete greundes were agast of þe gryme bere;
Þe birdes in þe bowes,
Þat one þe goost glowes,
Þei skryke in þe skowes,
Þat haþeles may here.
Line 130
XI.
¶ Haþelese miȝt here, so fer into halle,
How chatered þe cholle, þe chalus one þe chynne.
Þene coniured þe kniȝte, one crist cone he calle:
"As þou was crucifiged one croys, to clanse vs of syne,
That þou sei me þe sothe, wheþer þou shalle, [folio 3a]
Line 135
And whi þou walkest þes wayes, þe wodes with-in?"
"I was of figure and face fairest of alle,
Cristened and knowene with kinges in my kynne.
I haue kinges in my kyne, knowene for kene;
God has me gevene of his grace
Line 140
To dre my paynes in þis place,
I ame comene in þis cace
To speke with your quene.
XII.
¶ Quene was I some wile, brighter of browes
Thene berelle or Brangwayne, þes burdes so bolde;
Line 145
Of al gamene or gle, þat one grounde growes,
Gretter þene dame Gaynour, of Garsone and golde,
Of palaies, of parkes, of pondes, of plowes,
Of townes, of toures, of tresour vntolde,
Of Castelles, of contreyes, of cragges, of clowes;
Line 150
Now ame I cauȝte oute of kide to cares so colde,
Into care am I caughte, and couched in clay.
