'ffor to deme yt off resoun
By cler [[clere St.]] demonstracïoun,
Her in thys world, (by good avys,)
On ys a fool, A-nother wys;
Line 20098
Thys man glad, that man Irous;
He lovynge, he envyous;
On, ffrownyng, lokyng nat ffayre;
A-nother, off cher ys debonayre;
Line 20102
A-nother, off port ys gracyous;
A-nother, contrayre and déspytous; [[contrary & dispitious St.]]
On, stedefast, A-nother vnstable;
A-nother, in louë varyable.
Line 20106
On wyl do ryht, A-nother wrong;
Thys man ys ffeble, that man ys strong,
Thys man pensyff, that man ys sad,
He thys ys wroth, he that ys glad;
Line 20110
Thys man hasty in werkynge,
Another ys soffte and Abydynge;
Thys man ys hevy, that man ys lyht;
Thys goth be day, that man be nyht;
Line 20114
On vseth trouthe, he trecherye,
And to stele by Roberye.
O man ys trewe, A-nother ffals,
And somme Arn hangyd by the hals;
Line 20118
And (who lyst loken her-wyth-al,)
O man ys gret, A-nother smal;
Som man loueth wysdam and scyence; [folio 260a]
Som man, ryot and dyspence;
Line 20122
Som man ys large, som man ys hard;
Som man ys ek a gret nygard; [[C. & St.]]
He [[his St.]] thys A coward, he that ys bold;
And som man halt a good houshold;
Line 20126
And somme, off hertly indygence,
Ar fful streyhte off ther dyspence;
And som man, durynge al hys lyff,
Kan nat lyvë but in stryff.
Line 20130
'Wher-off komen al thys dyfferencys,
But off hevenly influencys,
By gouernaunce (who loketh al)
Off the bodyes celestyal?
Line 20134
