'ffor, than bothe, in wrong and ryht,
I wyl stryue with euery whyht,
Tak vp quarellys, and dyffame,
Sette on euery whyht a blame,
Line 13028
And, lyk a bole, (yt ys no dred,)
Myn Eyen Rollyn in myn hed;
Lyk a botore, [[The Bittern was supposed to have two stomachs.]] I haue also
Two wombys whan I haue A-do.'
Line 13032
The pylgrym:
"Expownë me, ánd nat ffeyne,
Hastow verrayly wombys tweyne?"
Glotonye:
'Trewly,' quod glotonye to me,
'I haue tweyne, as thow mayst se,
Line 13036
Wych ben ful nyh (who kan espye,)
Off the kynrede and allye
Off Venus; ffor lykerousnesse
Off welfare, and gret excesse,
Line 13040
Engendre and cause naturelly
fflesshly lust and lechery.
'And the ffyrst off thys kynrede
Ys callyd (who that taketh hede) [Stowe folio 229a]
Line 13044
Off som ffolkys 'Dronkenesse,'
And the tother 'Gredynesse'
Off sondry metys and deyntes;
And bothë two, in ther degres,
Line 13048
Wyl ther placys occupye,
Drynke and etë by envye.
Evere ther glotons appetyt [folio 199a]
Ys so ful off ffals delyt,
Line 13052
So gredy and so vnstaunchable,
Ther Etyk ys so importable;
Now I ete, and now I drynke;
Tyl I be ful vp to the brynke,
Line 13056
I do alway my besy peyne.
And trew(e)ly thys wombys tweyne,
Wych al devoure, and neuere slake,
Makë Venus to a-wake
Line 13060
Out off hyr slep, (lyk as I sayde,)
And causeth hyre fful offte abrayde.
