And þe fader þat him gat,
Beo him wel war of þat:
Bot he helpe hem at nede,
Shert lyf shal ben his mede
And luþer ending ywis,
Or holy writ spekeþ amis.
And who so honoureþ aright
Fader and moder be al his myght,
He shal haue atte gynnyng
Long lyf and goed endyng.
Nou shole ȝe here of þe ferthe
Þat god haþ comanded in erþe,
Þat in ernest and in game
In ydel nempne not his name.
If a man sek or wroth
Swereþ any gret oth
And nempneþ godes name þer inne,
Forsoþe þere he doþ dedly sinne.
Whan he any oth swereþ,
Godes limes he totereþ,
Or in gamen or in chest,
Þer he brekeþ godes hest,
Þat nempneþ his name in any stede,
Bot it beo in holy bede.
Þe fifte comaundement is þis,
Þat holy writ telleþ vs:
After man haþ wit nomen
And is out of fonston comen,
Shal lete misbeleue gon
And leoue in no god bot on.
Who so leoueþ on fals sermoun
Oþer on coniuresoun,
He is out of right beleoue
And is about god to greoue.
Suche beleoue were goed laft,
It is not bot þe deoueles craft.
Þ e sixte comaundement of tene
Of godes sone wiþ out wene:
Vpon bok swere no fals oth,
Noþer for leof ne for loth!
