And thenkeþ in clene lif to liue,
To þe preost whan he is com,
And he haþ his penance nom
And let it out of his þouht
And forȝet and doþ hit nought,
Þe penance þat is him aioynt,
Wit him wel wiþ þat poynt!
Bot he do it verrayment,
Þere he is in sleuthe hent.
Forsoþe it is a foul sinne
Any man to liuen inne!
Þese beo dedly sinnes seuen
Þat letten men to com to heuen.
God ȝeue us grace þo to shone
Þat we beon worþi forto woñ
In þe ioye þat no serwe may greue,
Þat god haþ mad to oure beheue.
Amen, amen, par charite,
If þat his blessed wille beo.
Expliciunt VIItem peccata mortalia. Incipiunt decem precepta.
Incipiunt decem precepta.
Alle þat thenke to beo shriuen
And out of dedly sinne to liuen,
Boþe men and wymmen,
Herkeneþ godes hestes ten!
Þat alle þat haue ȝeres twelle,
As god comaunded him selue,
Þe ten hestes þei sholde holde,
Alle þat were ten wintur olde,
Boþe heye and eke lowe
Þe ten hestes sholde knowe.
Vnderstond wel þis:
A lesse lord þan god is
Þat comaunded his men to do
A thing þat his herte fel to
