Catel winne and leye to hepe
And lete tresour ligge and slepe [Ms. sleple]
And fareþ him self wel at mele
And ȝeueþ pore men litel dele,
And whan he shal bye or selle,
Is for coueitise in wille,
Þat noman sholde after him winne —
Suche coueitise is dedly sinne.
Or if a man haue for neode
Leid to wedde on of his wede
Or any of his oþer thing,
Pot or panne, broche or ring,
And he þat it haþ in wolde
Hereþ telle, it mot beo solde,
And he wot it wel in thought
And byeþ it haluendel fo[r] nought —
A foul coueitise þat is
And an oker for soþe ywis.
Of pride and glotonye,
Of coueitise and lecherie
Nou haue ȝe herd a partye,
Nou shole ȝe here of enuye!
Enuye is a foul sinne,
And myche peopul liþ þer inne.
If a man haue enuie
To his neighbores hosbondrie
Of tilthe or of oþer thing,
Of triste or of housing,
And fondeþ boþe nyght and day
To make his better, if he may,
Þan his neighbores is —
Þer offe doþ he not amis.
For whi þat he in wille beo,
His neighebour fare as wel as he
And be for him neuer þe wors
On his body ne in his pours,
God nis not wroth wiþ þat enuie
Þat turneþ to no felonye.
Bot if he haue gret enuie
