erroure. [verse 7] My dere breþeren, loue we us to-gidere: for charite is of God; & eche þat loueþ his broþur of God he is bore, & God he knowiþ. [verse 8] He þat loueþ nouȝt knewe not God: for God is charite. [verse 9] In þat appered þe charite of God in vs: for he sente his owne sone in-to þe worlde, þat we lyue by him. [verse 10] & in þat is charite not as we haue loued God, but for þat he first loued vs, & sente his sone an helpe for oure synnes. [verse 11] My dere breþeren, if God haue loued vs, & we schulde eche loue oþur. [verse 12] No man saw God euere (or, eny tyme) [Underlined.] : if we loue to-gidere, God in vs dwelleþ, & his charite is in vs parfyte. [verse 13] In þat we knoweþ þat we in him dwelleþ & he in vs, for of his Spirite he haþ ȝeue vs; [verse 14] and we haue seye & bere witnesse, þat þe Fadur sente his sone Saueoure of þe worlde. [verse 15] Whoso is a-knowe þat Iesus is Godes sone, God dwelleþ in him, & he in God. [verse 16] & we haue knowe & we trowe to þe charite þat God haþ in vs. God is charite; & he þat dwelleþ in charite, he dwelleþ in God, & God in him. [verse 17] In þat is charite parfyte wiþ vs, þat we haue feiþ in þe day of dome; for ryȝt as he is & we beþ in þis worlde. [verse 18] Drede is not in charite: but parfyte charite putteþ [folio 76b] oute drede, for drede haþ peyne; soþly whoso drediþ, he is not parfite in charite. [verse 19] & þerfore loue we God, for first God loueþ us. [verse 20] Whoso-euere seiþ þat he loueþ God, & hateþ his broþur, he is a lyere: þe whuche soþly loueþ noȝt his broþur whom þat he seiþ, how may he loue God whom þat he seeþ nouȝt? [verse 21] & þat biddinge we haue of God, þat whoso loueþ God, he loueþ his broþer.
[verse 1] Alle þat troweþ þat Iesus is Criste þorowȝ God he is bore: & eche þat loueþ him þat gate, loueþ him þat of him is bore. [verse 2] In þat we knowe þat we loue Godes children, whan whe loue God, & we do his byddynges. [verse 3] Þis is soþly charite of God, þat we kepe his biddynges: & his biddynges ne beþ not greuous. [verse 4] For alle þinge þat is bore of God (or, þorowȝ God) [Underlined.] ouercomeþ þe worlde: & þis is þe victory þat ouercomeþ þe worlde, oure feiþ. [verse 5] Who is it þat ouercomeþ þe worlde? noon but he þat trowiþ þat Iesus is Godus sone. [verse 6] Þis is he þat come by water & blode, Iesus Criste; nouȝt only in water, but in watur & blode. & it is þe spyrite þat beruþ witnes þat Crist is soþfastnes. [verse 7] For þre þer beþ þat witnes bere in heuene, þe Fadur, þe Sone & þe Holy Goste: and þes þre beþ one. [verse 8] & þre þer beþ þat ȝeueþ witnes in erþe, Spirite, water, & bloode: & þre beþ one. [verse 9] Ȝif we take witnes of men, more is þe witnes of God; for þat [MS. þat for.] [is] þe witnes of God [folio 77] þat is more, for he bar witnes of his sone. [verse 10] Whoso troweþ in Godes Sone, he haþ þe witnes of God in him. He þat troweþ not in þe Sone he makeþ him a lyere, for he troweþ not in þe witnes þat God witnessiþ of his Sone. [verse 11] And þis is þe witnesse, for lyfe euere-lastynge he haþ ȝeue to us, & þat is þe lyfe in his Sone. [verse 12] He þat haþ þe Sone haþ lyfe; whoso haþ not þe Sone (of God) [Underlined.] , he haþ not lyfe. [verse 13] Þis I wryte vn-to ȝow, to make ȝow to wyte þat ȝe haue lyfe euere-lastynge þat troweþ in þe name of Godes Sone. [verse 14] & þis is þe feiþfulnes þat we haue to God, for what þinge so we vse axse aftur his wille, he hereþ us: [verse 15] & we wote þat he hereþ us, what-so we axe: & we wote þat we haue þe axsynges, þat we
