[verse 17] Þis beþ welles wiþ-outen watur, & cloudes þrowen aboute wiþ stormes (þat is, þei þat schulde haue watur of wysdom & techynge as men of holy churche, þei been alle drye, & þe cundyte of grace renneþ nouȝt to hem: but beþ cloudes derke wiþ synne, þrowen a-boute wiþ stormes of tempta|cyon. Þus vndurstonde I þis.) [Underlined.] in þe whuche dymnes of derkenes is kept; [verse 18] spekynge proude þinges of vanyte, deseyuynge hem in desyres of leccherye of flesche þat tristeþ to hem; & opynly lyfen in here errour, [verse 19] by-hotynge to hem frenes, & by hem-selue bounde & seruantes of corupcyon. Soþly of whom-so eny is ouercomen & þus defoulyd, his seruant he is. [verse 20] Soþly who-so feleþ þe fylynges of þe worlde in knowynge of oure Saueoure & oure Lord Iesu Criste, & efte in þe same ben ouercome, þanne þat lattere fallynge is wors vnto hem þan þe firste was. [verse 21] Soþly betre it were to hem not to knowe þe weye of ryȝtwisnesse, [folio 71] þan, aftur þat þei haue knowen it, to turne awey þer-fro aftur þat it is ȝeuen us in holy comawndement. [verse 22] Soþly to hem falleþ þe trewe prouerbe þat is seyde. Lyke þei ben to an hounde þat turneþ aȝeyn to ete þat he haþ spewe, and also to þe sowe þat wascheþ hyre in þe podel wiþ mukke al fyled.
[verse 1] My dere breþeren, I wryte þis vnto ȝow to be ȝoure secunde pistil in þe whyche I stere ȝoure ful clere myndes þorowe biddynge & bysekynge, [verse 2] þat ȝe þenke vpon þe wordis þat Crist haþ spoken vnto ȝowe and of þe apostelus wordes, & also of þe prophetes, & of þe comawndementis of oure Lord & oure Sauyour. [verse 3] & wyte ȝe wel þat first þer schal come in þe laste dayes bygyleris to disceyue, þat schal rewel hem aftur þeir owne lustus & þer lykynges, [verse 4] & bschul seye (þat is, of Crist to helpe & to deme) [b-b Underlined.] Where is his byheste, or where is his comynge? Seþen þat þe olde fadrus were deede, ȝut alle þinge lastuþ þus fro þe bygynnynge of eche creature. [verse 5] But þei haue no mynde how þat he made heuene & erþe, see & londe, & alle þorow his worde. [verse 6] Þorow þe whuche word he distroyede þanne þorow flowynge water al þe worlde, [folio 71b] saue a fewe þat were kept. [verse 7] Soþly þe heuenys þat now ben & erþe wiþ þe same worde—þat is, to heuene schal be fordon & erþe schal brenne—beþ maked a-ȝeyn, & kepte vnto þe fyre on þe day of dome, & vnto þe day of lesynge & peryschynge of þe wickede men. [verse 8] But o þinge, my dere breþeren, be knowen to ȝow & not hyde, þat o day wiþ God is as it were a þousande ȝeere, & a þousande ȝere but as it were o day. [verse 9] God taryeþ not in þinges þat he haþ byhette as some folke wene; but sufferyngelyche he abyduþ vs, willynge þat none perysche: but he wile þat alle be turned to penawnce in a-mendynge of here lyf. [verse 10] Soþfastly þe day of God sodeynly schal come as a þef vnwarned, in whos comynge hastyly heuenes schul passe (þat is, heuenly soules schul passe fro þe dredeful dome vnto þe blisse of heuene) [Underlined.] , þe elementes soþly þorow hete schul be vndone, & þorow brennynge of fyre þei schul be wastud, þe erþe soþly & alle þinges þat schal be þere-inne, alle þei schul be brent. [verse 11] Þerfore syþen alle þes beþ to be vndone, how nedeful is it þanne to us to be holy in lyfynge & pyte, [folio 72] [verse 12] abydynge & makynge us redy aȝeyn þe dredful comynge of oure Lord Iesu Criste, þorow whom heuenes brennynge
