that is, in the tother warld, he comes bifore thaim. for god is made his hilere fra all wrechidnes.
22. Et eduxit me in latitudinem: saluum me fecit, quo|niam voluit me. ¶ And he out led me in breed: he made saf me, for he wild me. ¶ When we suffire fleysly straytnes. he ledis vs in gastly breed, til brennynge and ioy of his luf: and swa oure meryt waxis. & we ere safe fra ded: and all this is for he wild vs or we wild him: and lufid vs in his goednes, noght for oure seruys.
23. Et retribuet michi dominus secundum iusticiam meam: & secundum puritatem manuum mearum retribuet michi. ¶ And lord [U lor.] sall ȝeld til me eftere my ryghtwisnes; and eftere the purte of my hend he sall ȝeld til me. ¶ That is, god sall ȝeld til me on domes day ioy and honur amange the aungels of heuen. eftere that i. am rightwis in trowth and luf and goed will. and eftere the clennes of my werkis: and alswa god in this warld ȝeldis gastly goed til his lufers, as swetnes in his luf & perseuerans.
24. Quia custodiui vias domini: nec impie gessi .a. deo meo. ¶ ffor .i. kepid the wayes of lord; .i. bare me noght wickidly fra my god. ¶ Rightwis he is that kepis godis wayis, that is, his comaundmentis: and he is clen that beris him noght wickidly, departand fra his god with ill thoght or ill delite.
25. Quoniam omnia iudicia eius in conspectu meo: & iusticias eius non repuli a me. ¶ ffor whi all the domes of him ere ay in my syght; and his rightwisnesis .i. put noght fra me. ¶ That is .i. bihald lastandly the medis of rightwismen, the pynes of dampnabil men. the fallyngis [S fallyngs. U flalyngis.] of amendabil men. the tempta|ciouns of proued men. he that thynkis ay in all there domes .i. wate neuer how he sould haf wille. to ga fra god, or to put his right|wisnes fra him. and torn til synn.
26. Et ero immaculatus cum eo: & obseruabo me ab iniquitate mea. ¶ And .i. sall be vnwemmyd with him; and .i. sall kepe me fra my wickidnes. ¶ That is .i. sall draw til god in luf, and swa be with him clen of dedly synn. ffor na man is in erthe that synnes noght venyally: and .i. sall kepe me that .i. fall namare in wickidnes.
27. Et retribuet michi dominus secundum iusticiam meam: & secundum puritatem manuum mearum in con|spectu oculorum eius. ¶ And lord sall ȝeld til me eftere my
