quid fecit. ¶ ffor the whilk thyngis thou made perfite; thai distroid. bot the rightwis what did he. ¶ Gif vs grace lord to stand agayns thaire wickid tonges, for that thou made perfite, that was thi louynge, of the mouthis of innocentes, and tha that kan noght defend thaim with clargy. thai distroid thorgh thaire ill saghis. bot the rightwis, ihū crist, what did he. as wha say, we aghe to folow him in his dede, that we nouther assent til ill mennys en|tycynge, ne be stird agayns thaim in hateredyn, bot suffire thaire malice for godis luf.
4. Dominus in templo sancto suo: dominus, in celo sedes eius. ¶ Lord in his haly tempile; lord, in heuen the setil of him. ¶ As wha say, if god won in vs, he makis vs bath tempil & heuen. that is witand his priuytes: and he is [S. U om.] restand in vs. for in haly saules is his rest, and his sete: and swa thai ere suffrand at godis will.
5. Oculi eius in pauperem respiciunt: palpebre eius interrogant filios hominum. ¶ The eghen of him lokes in the pore; his eghe lidys askis sonnes of men. ¶ The eghen of his mercy lokis in the pore, the whilke loke makis the pore heuen. and his egh lidys, that is the domes of god in erth, that now ere oppynd & now sperd, that is some tyme knawen some tyme noght. askis, that is proues, sonnes of men, whether thai kan suffire or thai fall in gruchynge.
6. Dominus interrogat iustum & impium: qui autem diligit iniquitatem odit animam suam. ¶ Lord askis the rightwis and the wickid: bot he that lufis wickidnis he hatis his saule. ¶ God askis, that is proues thorgh tribulacioun, the right|wis and the wickid: for he anly demes sothfastly of thaire consciens and in [S om.] askand. he fand that he that lufis wickidnes hatis his saule: for he slas it in swilk luf. Naman lifis withouten synn: bot he lufis wickidnes, the whilke synnes with ȝernynge & will, and if he ay lifid ay willd he synn: and for thi he sall ay be punyscht.
7. Pluet super peccatores laqueos: ignis sulphur & spiri|tus procellarum pars calicis eorum. ¶ He sall rayn on synful snares; fire brunstan [S bronston.] and gast of stormes part of the chalis of thaim. ¶ He sall rayne on synful in this warld snares, that is wickid lare, fire, of couaitis. brunstan [S bronston.] , that is stynk of ill werkis. and gast of stormes. that is a stormy thoght, that is withouten rest in
