7. Dixi domino deus meus es tu: exaudi domine vocem deprecacionis mee. ¶ I sayd til lord my god ert thou; here lord the voice of my praiynge. ¶ Many illys ere agayns me. and what remedy is. bot forto cry til my god. the prayers of ill men ere withouten voice. for thai cum noght of goed will. rightwismen has voice that god heris. for it is of charite.
8. Domine domine virtus salutis mee: obumbrasti super caput meum in die belli. ¶ Lord, lord, vertu of my hele; thou vmshadoud abouen my heuyd in day of bataile. ¶ Lord, lord, verralyest lord. noght as men ere lordis. thou gifis vertu. that is, perseueraunce, til my hele. that .i. be safe. thou vmshadoud with thi grace on my thoght in day of temptacioun, koland ill het.
9. Non tradas me domine a desiderio meo peccatori: cogitauerunt contra me, ne derelinquas me ne forte exal|tentur. ¶ Gif me noght lord, of my desire, til the synful: thai thoght agayns me, forsake me noght, leswhen thai be heghid. ¶ That is, suffire me noght to be gifen til the deuyl thorgh my ȝernynge. that is, when .i. hafe mare desire of any creature than of god. Oure enmys ere heghid when thai ouyrcum vs in swilke a ȝernynge. & thai ere glad of the maystry. for vs langis eftire a thynge of the warld. & noght eftire ihū crist.
10. Caput circuitus eorum: labor labiorum ipsorum operiet eos. ¶ The heuyd of thaire vmgange: the trauayle of thaire lippis sall hill thaim. ¶ Ill men ere in vmgange of erroure. whare is gate withouten end. of that vmgange is pride heuyd. the whilke, and trauayle of lippis, that is, leghynge, sall hil thaim. that is, defend thaim here, noght bifore god.
11. Cadent super eos carbones, in ignem deicies eos: in miserijs non subsistent. ¶ On thaim kolis sall fall, in fyre thou sall kast thaim: in wrechidnes thai sall noght dure. ¶ Kolis of couaytis. fyre of lichery, fallys on thaim first. sithen thou sall kast thaim in fyre of hell. and now in wrechidnes. thai sall noght dure in paciens. for thai ere ay grucheand & angry when thaim [U thai. S them.] ayls oght.
12. Vir linguosus non dirigetur in terra: virum inuistum mala capient in interitu. ¶ Man ianglere sall noght be rightid in erth; man vnrightwis illys sall take in dede. ¶ Aswhasay, now has the ill man goed. and he takis all the ioy that he may gete.
