170. Intret postulacio mea in conspectu tuo: secundum eloquium tuum eripe me. ¶ Myn askynge intire in til thi sight; eftire thi worde take me out. ¶ Of corupcioun of my body, for it is heuy to wrestil here sa lange. he that vndirstandis bi him self. is desayuyd. he that has vndirstandynge of god is takyn out of erroure. and in that.
171. Eructabunt labia mea ympnum: cum docueris me iustificaciones tuas. ¶ My lippis sall out rifte ympyn; when thou has lerid me thi rightwysyngis. ¶ That is, for .i. am fild of the brede of heuen. that is gastly delytis. .i. rifte louynge til god. and that may .i. noght do. bot in his lerynge when my thoght is hally in him. and in na creature.
172. Pronunciabit lingua mea eloquium tuum: quia omnia mandata tua equitas. ¶ My tunge sall shew forth thi worde; for all thi comaundmentis euenhede. ¶ Aswhasay, .i. sall be mynystire of thi worde. that is ful of euenhede. bot for many perils folous if .i. stabilly stand.
173. Fiat manus tua vt saluet me: quoniam mandata tua elegi. ¶ Thi hand be made that it safe me; for thi comaund|ment .i. chese. ¶ That is, thi helpe be ay nere me, that it safe me fra all ill myght. for .i. chese bifor all otherthynge to be buxsum til the.
174. Concupiui salutare tuum domine: & lex tua medi|tacio mea est. ¶ I couaytid thi hele lord; and my thynkynge is thi laghe. ¶ He that couayts hele of god. he thynkys in his laghe. and in his pryuetes his thoght is contynuelly. for na thoght of any creature may turne him thare fra.
175. Viuet anima mea & laudabit te: & iudicia tua adiuuabunt me. ¶ My saule sall life and loue the; and thi domys sall help me. ¶ In the tother warld my saule sall verraly and perfitly loue the in new sange. and thi domys, when thou sall say. cum ȝe blissid. sall helpe me. noght lose me. bot here bifore.
176. Erraui sicut ouis que perijt: quere seruum tuum domine quia mandata tua non sum oblitus. ¶ I errid as shepe that perysst; seke thi seruant lord; for .i. forgat noght thi comaundmentis. ¶ I errid. that is, .i. heldid fra life til ded, in luf of syn. as shepe that perysst. sett amange woluys, that nouther myght fle, na had strenght to stand agayn. bot now lord seke me. for .i. seke the. and haldis my hert in thi laghe.
