for as thai ware domys men thai seke if thai myght oght fynde me in any ill. and if thai may noght. thai speke agayns me. bot .i. was ay oysid in thi laghe in paciens.
24. Nam et testimonia tua meditacio mea est: & consilium meum iustificaciones tue. ¶ fforwhi and thi witnessyngis is my thoght: and my counsaile thi rightwisyngis. ¶ Aswhasay. my counsaile is to kepe that thou comaundis. that is, to luf myn enmys.
25. Adhesit pauimento anima mea: viuifica me secundum verbum tuum. ¶ My saule droghe til the pament; qwykyn me eftire thi worde. ¶ ffirst are .i. ware turnyd. my saule assentid til the pament. that is, til erthly thynge, lufand it. that is to trede on as on pament. bot thou god qwykyn me. that my thoght be in heuen, eftere thi worde. that is. as thou hight til thi folouers.
26. Vias meas enunciaui & exaudisti me: doce me ius|tificaciones tuas. ¶ My wayes .i. shewid and thou me herde: lere me thi rightwisyngis. ¶ That is, .i. shrafe my synnys and thou forgaf thaim. and fra now forth lere me what .i. sall do.
27. Viam iustificacionum tuarum instrue me: & exercebor in mirabilibus tuis. ¶ The way of thi rightwisyngis lere thou me; and .i. sall be oysid in thi wondirs. ¶ Aswhasay, .i. damyn my wayes, lere me thin. that .i. wit what .i. sall do. and the ordire of doynge. bot for many trauayls in hardnes thare of he says.
28. Dormitauit anima mea pre tedio: confirma me in verbis tuis. ¶ ffor noy [S. U om.] slomyrd my saule; conferme thou me in thi wordis. ¶ That is, .i. did litill goed or noght, for noy of delaiynge. for myn askynge was delayid. he says noght .i. slepe, bot .i. slomyrd. that is, of him that is wery and abidys. that is kalde slawnes. bot thou conferme me in thi wordis. that .i. fall namare in that noy.
29. Viam iniquitatis amoue a me: & de lege tua miserere mei. ¶ The way of wickidnes stire fra me: and of thi laghe hafe mercy of me. ¶ That is, hafe mercy of me. that .i. may fulfil the laghe of charite. as whasay, do away ill and gif goed.
30. Viam veritatis elegi: iudicia tua non sum oblitus. ¶ The way of sothfastnes .i. chese; thi domys hafe .i. noght forgetyn. ¶ That is, .i. chese crist til my lufand, swa .i. thynke thi domys.
31. Adhesi testimonijs tuis domine: noli me confundere. ¶ I droghe til thi witnessyngis. lord; willnoght me confounde. ¶ He draghis til godis worde that forsakis the warlde and despisis
