CONFITEMINI domine quoniam bonus: quoniam in seculum misericordia eius. ¶ Shrifis til lord for he is goed: for in warld the mercy of him. ¶ And that .i. say of his mercy.
2. Dicant qui redempti sunt a domino quos redemit de manu inimici: de regionibus congregauit eos. ¶ Say thai that ere boght of lord, the whilk he boght of the hand of enmy: and of rewmys he gedird thaim. ¶ Crist with his blode boght cristen men fra the deuyl. and gedird thaim tobe a folk of god. that bifore was scatird in sere errours. whethen gedird he thaim.
3. A solis ortu & occasu: ab aquilone & mari. ¶ ffra the rysynge of the son. and the settynge: fra the north and the see. ¶ The see he settis for [S. U fra.] the south. for the grete see is in that syde of the warld.
4. Errauerunt in solitudine in inaquoso: viam ciuitatis habitaculi non inuenerunt. ¶ Thai errid in anly stede. in stede withouten watire: the way of wonynge of the cite thai noght fand. ¶ Thai errid for thai knew noght sothfastnes. dwelland in anly stede withouten god. and in stede withouten watire. that is, withouten haly lare. for thai fand noght ihū crist. that is way that ledis til the cite of heuen, whare goed wonynge is. for thai ware.
5. Esurientes & sicientes: anima eorum in ipsis defecit. ¶ Hungirand & threstand: thaire saule faylid in thaim self. ¶ That is, thai had noght mete of godis worde, na drynke of his grace: forthi na wondire if thaire saule faylid fra gastly goed. for it dwellid in thaim selfe. that is, it passid noght til godis luf. ffor luf suffirs noght oure thoght to be in oure selfe. bot it rawysshis it in til the thynge that we luf. the whilk luf if it be in god. it is oure corown. if it be in any creature it is fire that bren sall oure kaytif saules.
6. Et clamauerunt ad dominum cum tribularentur: & de necessitatibus eorum eripuit eos. ¶ And thai cried til lord when thai ware in anguys: and of thaire nedyngis he toke thaim out. ¶ Thai ware ouercomen in defaute and in errour and hungire. thai cried and he delyuerd thaim of nedyngis. that is, of illis the whilk thai myght noght fle.
