whom he calles heuen, is warnyst with watirs. that is, with other giftis of the holygost. that nothing may ouercum thaim. & god strekis thaim as a skyn. that is, he makes thaim large in perfitnes, as hit falles til men that are dedly.
4. Qui ponis nubem ascensum tuum: qui ambulas super pennas ventorum. ¶ Thou that settis cloude thi steghing: thou that gos abouen the fedirs of wyndes. ¶ That is, thoro shadoyng of thi grace we are taken in contemplatyf life. bot thou passis all swyftnes of our thouȝtis, how holy or suttel so thei be.
5. Qui facis angelos tuos spiritus: & ministros tuos flammam ignis vrentem. ¶ Thou that makes gostis thin aungels: and thine minystres fire brennand. ¶ That is, the gostis of kynde that are ay before the. when thou wol thou makes thaim messangers of thi will. and thi seruantes thou makes thaim brennand in fuyre of luf, that wastis the hay of vices.
6. Qui fundasti terram super stabilitatem suam: non inclinabitur in seculum seculi. ¶ Thou that groundid the erthe on the stabulnes: hit shal not be heldid in worlde of worlde. ¶ That is, thou festid thi kirke on crist, that hit last euermore.
7. Abyssus sicut vestimentum amictus eius: super montes stabunt aque. ¶ Depnes as [S. L of.] cloth the couering of it; abouen hilles shal stond watirs. ¶ Depnes of tribulacyon shal be couering of holy kirke as cloth. for it shal be vmlappid tharin. and on hilles, that is, in holy men. shal stand watirs of persecucyon. bot not long. for,
8. Ab increpacione tua fugient: a voce tonitrui tui for|midabunt. ¶ Of thi blamyng thei shal flee: of the voyce of thi thonur thei shal drede. ¶ That is. the; blamand [S. L blamyng.] wikkidmen; thei shal flee fro noyng of riȝtwysmen: for of thi thonur. that is, of manasing with thi strayte dome, thei hafe drede.
9. Ascendunt montes & descendunt campi: in locum quem fundasti eis. ¶ Hilles steghes and feldes descendes: in stid that thou groundid til thaim. ¶ Hilles, that is, prelates, are heghid in thair dignites: and feldis, that is, sugets, descendes in wilful obedience. and tho and thes. are in thair stid. that is. thei do aftur the grace that thou gifis til thaim.
10. Terminum posuisti quem non transgredientur: neque conuertentur operire terram. ¶ Turme thou set that thei may
