5. Et custodia in nocte: que pro nichilo habetur eorum anni erunt. ¶ And kepynge in nyght: that for noght is hade of thaim the ȝeris sall be. ¶ That is, as wakynge in nyght that has bot thre hours: til the whilke wakynge liknys he this life, for it is gane in besynes. and in myrknes of this warld. and swa is hade for noght ther ȝeris, that is, as dremys.
6. Mane sicut herba transeat, mane floreat & transeat: vespere decidat induret & arescat. ¶ The morne as herbe pass. the morn floryss and pass: at euyn it fall, hardyn, and dry. ¶ My ȝeris wanys away. for the morn of barnhede pass. as herbe that is chawngid sone fra that qualite. and the tother morn of ȝouthede floryss and pass. that is, sone hafe it shewid the floure. and broght it away. & cum tyll euyn of kald elde that fall in ded. hardyn in karynn. and dry in till dust. where is his herbe. whare is his floure: all is welkyd.
7. Quia defecimus in ira tua: & in furore tuo turbati sumus. ¶ ffor we fayld in thi wreth; and in thi woednes druuyd ere we. ¶ That is [S. U om.] , for adam syn we all fayld fra the state of inmor|talite. bot in thi woednes. that is, in thi rightwis dome, many ere druuyd. that is, damnyd til hell.
8. Posuisti iniquitates nostras in conspectu tuo: seculum nostrum in illuminacione vultus tui. ¶ Thou sett oure wickidnessis in thi sight; & oure warld in lightnynge of thi face. ¶ That is, na syn that we do may be hid fra the. and the luf that we hafe til this warlde thou sett it bifor the forto punyss it.
9. Quoniam omnes dies nostri defecerunt: & in ira tua defecimus. ¶ ffor all oure dayes faylid: and we faylid in thi wreth. ¶ Lufand the thynge that is passand. for of thi wreth oure dayes ere shortid. sen that we synnyd in hope of langere life.
10. Anni nostri sicut aranea meditabuntur: dies anno|rum nostrorum in ipsis septuaginta annis. ¶ Oure ȝeris as the arane sall thynke; the dayes of oure ȝeris in seuenty ȝere. ¶ As the erayn makes vayn webbes. forto take fleghis with gile. swa oure ȝeris ere occupyde in ydell and swykil kastis about erthly thynge. and passis withouten froyt of goed werke, waste in ydyll thynkynge [S thinkyng. U thyngynge.] and vnnayt dede. & the dayes of oure ȝeris ere fulfild. in seuenty ȝere. that is, thai brynge noght forth bot that fallis till fleyssly life, that rennes with seuen dayes.
