.i. dye withouten spot. in thi sothfastnes. in the whilke thou hight endles ioy til all lufand the. and now glad be my hert in thi drede. that .i. drede the withouten dispayre. and ioy in the withouten vnscilwis sikirnes.
11. Confitebor tibi domine deus meus in toto corde meo: & glorificabo nomen tuum in eternum. ¶ I sall shrife til the lord my god in all my hert: and. i. sall glorifye thi name withouten end. ¶ As wha say .i. sall luf perfitly. and last tharin stabilly. and hald thi name [S ins. 'ihū.'] ioyful in my hert.
12. Quia misericordia tua magna est super me: & eruisti animam meam ex inferno inferiori. ¶ ffor thi gret mercy is on me; and my saule thou delyuerd out of the laghere hell. ¶ Thi gret mercy, that thou forgifis syn; when .i. sorow tharfore. is on me in victory of my fas. and that is sene for thou delyuerd me of the laghere hell. that is, of dedly synnys. thorgh the whilke .i. had bene in hell. eftere my ded, if thou had noght delyuered me here.
13. Deus iniqui insurrexerunt super me, & sinagoga potencium quesierunt animam meam: & non proposuerunt te in conspectu suo. ¶ God wickid rase on me and the syna|goge of myghty soght my saule: and thai sett noght the in thaire sight. ¶ God, wickid fendis aforsed thaim to ouerecum me in temptacioun. and the synagoge. that is, the gadirynge of proude men soght to sla my saule. with hand or with tunge. and thai sett noght the in thaire sight. for that is the manere of ill thoghtis. that thai neuer mare hafe godis drede bifore thaim.
14. Et tu domine deus miserator & misericors: paciens & multe misericordie & verax. ¶ And thou lord merciere and merciful: suffrand and of mykil mercy and sothfast. ¶ [S ins. 'God.'] Merciere, doand dede of mercy. and mercyful of kynde. suffrand. that is, abydand synfulmen. and of mykil mercy till thaim. that turnys thaim til the. and sothfast in hetyngis and ȝeldand til meritis.
15. Respice in me & miserere mei, da imperium puero tuo: & saluum fac filium ancille tue. ¶ Loke in me and hafe mercy of me. gif empire til thi barn: and make safe the sun of thi handmayden. ¶ Eftire the anguys of this warld. gif empire til thi barne. that is, myght to deme til haly men. the whilke sall sitt iuges.
