his werkis. as thaire fadirs wele hight. and noght did swa. thai ere turnyd in wickid boghe. that is, thai ere as the boghe of a fals man, that first bendis it and sithen layes it down, when nede ware to shote.
64. In iram concitauerunt eum in collibus suis: & in sculptilibus suis ad emulacionem eum prouocauerunt. ¶ In wreth thai stird him in thaire hilles: and in thaire ymages til dedeyn thai him forthkald. ¶ In hillis thai stird him till wreth. that is, in pride and vnbuxsumnes. and in thaire ymages. that is, in luf of many vanytes. as sum honurs the ymage of vayne glory. sum of ypocrisy. sum of womannys luf. sum of erthly dygnyte. sum of auarice. there sculptils thai lout, noght god. forthi he has dedeyn of thaim. and dampnys thaim.
65. Audiuit deus & spreuit: & ad nichilum redegit valde israel. ¶ God [S. U He.] herd and despysid: and til noght he broght ful mykil israel. ¶ He herd the grete cry of thaire synnys. and he despisyd. that is, he vengid him on all that makis swilke ymage. and he broght israel til noght. that is, all fals cristen men. for he sall prife thaim of thaire pouste.
66. Et repulit tabernaculum sylo: tabernaculum suum vbi habitauit in hominibus. ¶ And he put agayn the taber|nakil of sylo; his tabernakil whare he wonnyd amange men. ¶ That is. he wonnys noght in a hert that is led with ydell thoghtis. and ill stiryngis. bot his wonnynge is amange men that has clene thoghtis.
67. Et tradidit in captiuitatem virtutem eorum: & pul|critudinem eorum in manus inimici. ¶ And he gafe in caytifte the vertu of thaim; and thaire fairhede in the hend of enmy. ¶ That is, the strenght that thai hafe he suffirs thaim to spend in seruys of the deuel. and swa he defouls thaire fayrhede in dedly syn.
68. Et conclusit in gladio populum suum: & heredita|tem suam spreuit. ¶ And he loukid in swerd his folke: and his heritage he despisid. ¶ When ill men ere gifen in the fendis myght. on ilke syde temptaciouns rises. and thai ere loukid in ded of saule. for;
69. Iuuenes eorum comedit ignis: & virgines eorum non sunt lamentate. ¶ The ȝunge men of thaim fire ete; and thaire
