8. Filij qui nascentur & exurgent: enarrabunt filijs suis. ¶ Sunnys that sall be borne and sall rise: sall tell till thaire sunnys. ¶ Sunnys that sall be borne til god, and sall rise out of vices & slawnes. sall tell til thaire sunnys, that is, til thaire folouers.
9. Vt ponant in deo spem suam: & non obliuiscantur operum dei, & mandata eius exquirant. ¶ That thai sett in lord god thaire hope; and that thai forget noght the werkis of god. & that thai seke his comaundmentis. ¶ This sall we tell. that oure sunnes sett thaire hope in god. noght in any creature, as gold or syluere. or other thynge. and that thai forget not what god has done for thaim. swa that thai seke ay to fulfill his comaundmentis.
10. Ne fiant sicut patres eorum: generacio praua & exasperans. ¶ That thai be noght as thaire fadirs; generacioun wickid and sharpand. ¶ That thai be noght vnkynde as thaire fadirs was. that ȝeldid til god ill for goed. for thai ware generacioun wickid in will. and sharpand god in werke.
11. Generacio que non direxit cor suum: & non est creditus cum deo spiritus eius. ¶ Getynge that rightid noght his hert: and with god trowid is noght the gast of him. ¶ Wickid getynge neuermare rightis his hert til god to do his will: forthi the gast of him is noght trowid with god. that is, he has na trouth to do the thynge that god comaundis.
12. Filij effrem intendentes & mittentes arcum: conuersi sunt in die belli. ¶ Sunnes of effrem bendand and sendand boghe; turnyd ere in day of bataill. ¶ Sunnys of effrem ere all faynt cristen men. that bendis the bowe. and sendis aruys. that is, thai let as thai armyd thaim to stand with god. and spekis wordis of hetynge, that thai wild do all that he biddis thaim. bot in day of bataile. that is, in tyme of temptacioun. thai faile and turnys agayn til thaire alde custum. and tha.
13. Non custodierunt testamentum dei: & in lege eius noluerunt ambulare. ¶ Noght kepid the testament of god: and in his laghe thai wald noght ga. ¶ That is, that thai hight til god thai wild noght fulfill: and in his laghe. that is, charite, thai lastid noght. bot thai make thaim seruaunte till all vicys.
14. Et obliti sunt benefactorum eius: & mirabilium eius, que ostendit eis. ¶ And thai forgat his goed dedis: and his wondirs the whilke he til thaim shewid. ¶ That is. thai ere vnkynd til godis beneficis: for he gifis thaim welth and riches,
