3. Quia exacuerunt vt gladium linguas suas: intenderunt arcum rem amaram, vt sagittent in occultis inmaculatum. ¶ ffor thai sharpid as swerd thaire tunges: thai bent boghe bittere thyngis, that thai shote in hidils the vnfilde. ¶ Thai sharpid. as swerd, apertly criand his ded, thaire tungis, with the whilke thai sloghe crist. thai bent bowe. that is tresons, that was bitter [S. U om.] thynge, thof thaire wordis ware swete: that thai shote in hidils, as thai wend, the vnfilid. forthi thai may not be excused.
4. Subito sagittabunt eum, & non timebunt: firmauerunt sibi sermonem nequam. ¶ Sodanly thai sall him shote, and thai sall not drede: thai festid till thaim wickid worde. ¶ Sodanly, as naman wend or wist what thai thoght, thai did thaire felony, and dred not tharfore; hard hert thai had. and thai myght fynd in thaire hert to sla him whaim thai saghe raise ded men. bot thai festid wikworde [S wickede worde.] , for malice criand his ded, til thaire aghen dampnacioun.
5. Narrauerunt ut absconderent laqueos: dixerunt quis videbit eos. ¶ Thai tald that thai myght hide snares; thai sayd wha sall see thaim. ¶ This is the maner of ill men. When thai redy amange thaim treson. thai wene to bigile. swa that naman myght fle thaire desaytes. as wha fall in a gildire that is not sene na witen of. for thai sayd, wha sall se thaim. that is, oure snares. As|whasay, we sall wirke swa priuely that nane sall witt.
6. Scrutati sunt iniquitates: defecerunt scrutantes scru|tinio. ¶ Thai ransakid wickidnessis: thai failid ransakand in ransakynge. ¶ Thai ransakid wickidnes. how thai myght accuse the rightwisman with fals witnes. bot thai, ransakand falsnes, faild in thaire ransakynge. that is, in thaire wickid counsaile: for the sharp|liere that thai thynke, the mare thai faile fra sothfastnes, and the deppere ere tha [S tho. U om.] in myrknes. for thai se not god. and therfore thai wene that god has na sight of thaim.
7. Accedet homo ad cor altum: & exaltabitur deus. ¶ Man sall cum till heghe hert; and god sall be heghid. ¶ He that ransakis wickidnes fails. bot aman ransakand goed. sall cum till heghe hert. that is, till heghe vndirstandynge in thyngis of god: and thare he fails not. bot god sall be heghid in his hert, whare god waxis not in him selfe.
8. Sagitte paruulorum facte sunt plage eorum: & in|firmate sunt contra eos lingue eorum. ¶ Aruys of smale
