in doutis aske thaim rede, for god fra thaim gifes answere til other, as fra his tempile.
4. Omnes declinauerunt, simul inutiles facti sunt: non est qui faciat bonum, non est vsque ad vnum. ¶ All thai heldid, samen vnprofitabile thai ere made: he is not that dos goed, thare is not til ane. ¶ Lokand that he fand, that all thai helde fra god. and samen with that heldynge thai ere withouten prou til thaim selfe and til other. and swa nane is of thaim that dos goed, for nane is led with skill.
5. Nonne scient omnes qui operantur iniquitatem: qui deuorant plebem meam vt cibum panis. ¶ Ne sall thai not witt all that wirkis wickidnes: that devours my folke as mete of brede. ¶ Thai sall wit in the dome of crist thorgh prouynge of pyne, all that wirkis wickidnes. that now will not wit that god is, and that he dampnes synfulmen. the whilke deuours my folke, that is, thai ete thaire goedes gredily, and thai wast thaim. for he that will refe me that .i. sould life with. he refes me my life. as mete of brede, that is assiduelly. and thai delite thaim in thaire syn.
8. Deum non inuocauerunt: illic trepidauerunt timore, vbi non fuit timor. ¶ God thai not inkald: thare thai quoke for dred whare dred was noght. ¶ As wha say, all this ill thai say and do. for thai kall not god in till thaire hertis. and swa thai perisse. for thai drede to tyne erthly thyngis, or to be pore, that is not forto drede. bot to lose the ioy of heuen. thai drede nathynge: that ware at drede.
7. Quoniam deus dissipauit ossa eorum qui hominibus placent: confusi sunt, quoniam deus spreuit eos. ¶ ffor lord has skatird thaire banes that plesis til men: shamed thai ere, for god despised thaim. ¶ It is na wondire thof thai hafe na myght to do wele. for god has scaterd all thaire banes. that is, all vertu and goed of thaire saule. that plesis til men in fayntis and flaterynge, to get thaire lufredyn. and giftis of thaim. and will not say thaim the soth. na reprehend thaim when thai syn. for thai drede to wreth thaim. swilke and other that plesis til thaim selfe in thaire lustis and couaitis, thai plese til men noght til god. forthi thai ere shamed. that is, thai sall be departid fra the haly court of heuen: for god has despised thaim, that is, he sall dampne thaim till hell. for thai despisid him. gifand til men drede and honur. that thai sould hafe done till hym.
