God wax wroht wiþ me in hast
Line 295
And dede me, & myne angeles, fast
Fro heuene to fallen þo.
Þus þorghe þe we lorn oure blis
And oure mery dwellynge, ywis,
And fellen doun in to wo.
Line 300
Whanne we were þus fro blesse rut
And þow in þat blisse put,
Þo hadde y to þe enuye
Þat þow sholdest in þat blisse byde
Þat we losten for oure pryde.
Line 305
Þy womman þo temptide y
To taken þe appel on þe treo
And þerwiþ to gylen þeo —
Þus þorghe here y dede
Þat þow fro blisse were put out,
Line 310
As y aforhand was saun dout
Fro þat mery stede".
Whanne Adam hadde herd þe deuel þus told,
He wepte teres manyfold,
And loude þus cride he:
Line 315
"Al my ioye and my blis,
Lord god, in þyn hond is:
Help, ȝif þy wille be,
Þat þis deuel, myn aduersarie,
Haue power no lenger me to tarie;
Line 320
Þat blisse aȝen ȝif me
And teche me somwhat me to were,
Þat þis fend namore me dere,
Lord, y praye þe!
For he is abouten me to traye".
Line 325
Anon þe deuel vanschede awaye.
An angel þo cam fro heuene
And seide: "Adam", as god gan sende:
"Ȝif þow wilt fro þe deuel þe fende,
Worsche after my steuene: [Ms. worsche st. worche.]
Line 330
God bit þe wiþ glade mod
Taken þe tende part of þy guod
Þat þe nyweþ by ȝere —
Loke his wille þat þow fulfil!
Bere it to an heȝ hil,
Line 335
And do it setten a fere
And lete it brenne wiþoute gref,
In to gret spyt and repref
Of þe deueles alle —
As þeȝ þe tende ordre were
Line 340
In heuene wiþ oure lord dere,
Til synne made hem to falle.
Ȝif þow wilt þus tyden wel,
þow myȝt þe kepen fro þe deuel"
Þe angel þo wente him fro.
Line 345
Adam stod stille in his penaunce
Fourty dayes, wiþouten destaunce,
And seuene dayes ȝut mo,
Al wey in þe water Jordon.
Þanne seide Eue to him anon:
Line 350
"Adam, leue now ȝe!
For noþer þe ferste tyme ne now
Þe deuel myȝte noȝt gylen ȝow,
Bote ay deseyuede me;
In herte y was noȝt stedefast,
Line 355
Noþer ferste tyme ne last,
Bote brak my godis lore.
I am wel worþy for to deye:
Sle me, Adam, y ȝow preye,
Þat god se me namore!
Line 360
Or hyde me fro godis siȝt!
I am noȝt worþy wiþ riȝt
To dwellen here, y seye.
Bote in þe west y wil go wone
At þe goynge doun of þe sonne,
Line 365
Alone, til y deye".
Sche dede hire forþ in to þe west,
Euere sorwynge wiþouten rest,
Wepynge euen & morn
In here dwellynge þat was wyld,
Line 370
And hadde in here wombe conseyued a child
Bote þre monthes aforn.
