Off ȝow schall cume frowte gret,
And euer be in blysse with-owt ȝynd, [ȝynd, end.]
Line 400
For ȝe drede me as god a-lon,
And kepe my commawmentes eueryschon.
My blyssyng I ȝeffe, were so euer ȝe goo.
Abraham.
Loo, ysaac, my son, how thynke ȝe
Line 404
Be thys warke that we haue wrogth,
Full glad and blythe we may be [folio 21b]
Aȝens þe wyll of god þat we grucched nott,
Vp-on thys fayer hetth.
Line 408
Ysaac.
A! fader, I thanke owr lord euery dell,
That my wyt servyd me so wyll,
For to drede god more than my detth.
Abraham.
Why dere-wordy son, wer thow a-dred?
Line 412
Hardely, chyld, tell me thy lore.
Ysaac.
ȝa, be my feyth, fader, now hath I red,
I wos neuer soo afrayd be-fore,
As I haue byn at ȝyn hyll.
Line 416
But be my feyth, fader, I swere
I wyll neuer more cume there,
But yt be aȝens my wyll.
Abraham.
ȝa, cum on with me, my owyn swet sonn,
Line 420
And hom-ward fast now let vs goon.
Ysaac.
Be my feyth, fader, ther-to I grant,
I had neuer so good wyll to gon hom,
And to speke with my dere moder.
Line 424
