& bouȝte hom suþþe wiþ raunson · suich lif longe ilaste ·
Line 11,910
Mid mangenels & ginnes · hor eiþer to oþer caste ·
Þe legat & þe erchebissop · wiþ hom al so nome ·
Tueie oþere bissops · & to keningwurþe come ·
To makie acord wiþ þe king · & þe deserites al so ·
& hom of þe castel · ȝuf it miȝte be ido ·
Line 11,915
Ac þe deserites nolde noȝt · do al after þe kinge ·
Ne hii of þe castel naþemo · ne stonde to hor lokinge ·
Þe legat mid is rede cope · amansede þo ·
Hom þat in þe castel were · & ȝut þer to wel mo ·
Alle þat hom holpe · oþer were at hor rede ·
Line 11,920
Oþer to hom ensentede · in wille oþer in dede ·
Hii of þe castel tolde · her of gret despit ·
Cope & oþer cloþes · hii lete make of wit ·
& maister philip porpeis · þat was a quointe man ·
Clerc and hardi of is dedes · & hor cirurgian ·
Line 11,925
Hii made a wit legat · in þis cope of wit · [Hearne page 567]
Aȝe þe oþer rede · as him in despit ·
& he stod as a legat · vpe þe castel walle ·
& amansede king & legat · & hor men alle ·
Suich game ilaste longe · among hom in suich striue ·
Line 11,930
Ac wel god nas it noȝt · to soule ne to liue ·
Sir Ion deiuile · & oþere þat deserited were ·
Nome þe yle of eli · & hulde hom vaste þere ·
& in grauntebrugge ssire · of oþer mannes inov ·
Vette & astorede hom · þei it were mid wou ·
Line 11,935
· Henricus · [folio 167b]
Þe gywes hii slowe ek · þat hii miȝte finde ·
Hor tresor ne hor oþer god · hii ne lete nouȝt bihinde ·
Þe king at sein bartelmeus tid · made ich vnder stonde ·
At keningwurþe a parlement · of heiemen of þe londe ·
