touching it, than to not loue it with touching of it. And therfore to me, (as man freel bi kinde and not hardi for to feele of my silf that y am in the fulnes of perfeccioun,) it is surer for to chese this parti which is for to not loue money with the not handling of it, than for to not loue money with the handling of it. And whanne ȝe seien ferther thus, that the more good and the perfiȝter good and the hiȝer good and the neerer good to perfeccioun is alwey of ech man to be chose and executid bifore other lasse good and romber good fro perfeccioun, certis this is not trewe; for thouȝ ech man ouȝte loue and desire such now seid gretter good bifore the lasse good, ȝit not ech man ouȝte chese forto do and execute such more good bifore the lasse gode, but perfit men at fulle [the fulle, MS. (first hand).] mowen so chese and ouȝten so chese, and vnperfit men cumbrid in her freelnes and in her passiouns ouȝten chese ful ofte the sikerer and surer good to hem bifore the vn|surer good; thouȝ thilk surer good be lasse good in it silf or to a perfit man, than is thilk vnsurer good." And this is ynouȝ for answere to the laste now maad chalenge.
And ferthermore forto seie fynali as here in this mater: What euer eny man chalenge or obiecte aȝens this now seid forbering of moneyes touching, this wole euer be founde trewe, that it is peyne lasse or more to ech man so forbering [bering, MS. (first hand).] as ofte as he so for|berith, and forto take such a peyne so ofte comyng and that for Goddis [forgoddis, MS. (perhaps by mere accident; but?).] loue and into amendis making for synne, (namelich whilis thilk same absteynyng in peyne is a meene into geting of a moral good, which ellis schulde not be had or not so miche had,) it
