it is not leeful that the seid couent or religiose per|soon expende the same ȝifte into eny other vce or expending, thouȝ the other vce and expending were leeful ynouȝ. But so it is, that whanne lordis and ladies and othere persoones of the louȝer comunalte ȝeuen her almes (movable or vnmovable) to religiouns receyuyng possessiouns or to religiouns of begging, thei ȝeuen thilk almes into vce and expending aboute her owne goostli and bodili necessaries perteynyng to good state of the religiouns oonli, and not into vsis and expendingis vnperteynyng to tho religiouns and to her persoones: and herwith so it is, that the vce and expending of the godis ȝouun into religioun, (mad and doon into bilding and reparing of the seid lordli mansiouns,) is not necessarili longing to the state of the religiouns, neither of the religiose per|soones, in that and for that that thei ben religiose. Wherfore it semeth folewe, that tho goodis ȝouun into religiouns bi lordis and ladies and the louȝer peple ouȝten not be expendid in to bilding and reparing of suche seid lordli dwellingis.
Answere to this obieccioun is forto denye euereither parti of the ije. premysse sett in the argument or [Probably we should read of.] the obieccioun. Forwhi sufficient record of writingis and open experience han schewid and now schewen weel, that ful ofte whanne lordis and ladies and othere peple ȝauen and now ȝeuen to religiose couentis vn|mouable or mouable good, thei pointiden not into what vsis the receyuers schulden expende thilk good; but the ȝeuers trustiden that the receyuers wolden expende thilk good vertuoseli and holili, and not other wise than it bisemed. And with this trust thei helden hem content and paied in her ȝifte making, for thei wisten weel that tho religiose persoones wolden first expende aboute her religioun and aboute
