hath in possessioun, that he ther with do almes? And ȝit Crist biddith there generali withoute excepcioun. And therfore it is seen to be trewe, what y haue now seid to be the iije. notabilite.
Sotheli and withoute doute these iij. notabilitees weel considerid and attendid of thilke persoones, name|lich of the lay party whiche wolen needis entirmete with the Newe Testament, is worth to hem a buyschel ful of gold; and that bothe forto purge hem of wrong opiniouns gaderid to hem bi occasioun of textis in the Newe Testament, and also for to preserue hem that thei falle not into suche vntrewe opiniouns takun bi occasioun of textis in the Newe Testament. And verili and sotheli to seie, the vnconsideracioun and the vnknowing and the [the is wrongly (?) cancelled by a later hand.] vnremembraunce of these thre now bifore sett notabilitees hath be a ful greet cause or occasioun of ful greet presumptuose iuge|mentis in summe of the lay partie, and of greet cisme and of greet horrour and of abhominacioun born anentis the clergie bi summe of the lay partie; of whiche thei wolden be schamed, if thei consideriden weel these thre bifore sett notabilitees, namelich if ther with thei wolden ouer reede the first parti of the book clepid The iust apprising of Holi Scripture.
Neuertheles, not withstonding al what fro the bi|gynnyng of the vje. chapiter in this present iiije. partie hidir [to] is seid for to iustifie the ve. seid prin|cipal gouernance, ȝit y holde this, that ouer greet mul|titude of mennys posityue lawis ouȝten not be mad; but prelatis and princis ouȝten be weel waar that ouer manye posytyue lawis be not [not is interlineated in a later (?) hand.] ȝouun to her peplis. For sotheli ther of cometh causeli nedis ful myche yuel, more than y se men considere it so to come. Of
