to gidere wijsist purueier and tendirist louer. But so it is, that Crist not ordeyned these spokun mennys lawis and tradiciouns; forwhi it is open ynouȝ that men founden hem and devisiden hem, and that now late sum and manye of hem. Wherfore thei be not necessarie, neither thei ben in no notable degree better to be had than to be not had.
ix. CHAPITER.
FOR answere to the first semyng skile mad bifore in the bigynnyng of the next chapiter aȝens the ve. [iiij e., MS.] principal gouernaunce, the ije. premysse in the first argument mad there is to be denyed; and thanne next, whanne ij. longe processis, (oon of Math. xve. capitulum. and an other of Mark vije. capitulum.,) ben alleggid forth forto proue the same ije. premysse, it is to be seid that bi tho ij. longe processis mai not be had more as to this present purpos than these iiij. pointis.
Oon is: That Crist blamed ij. tradicions of the Iewis there rehercid; oon bi which it was ordeyned, that a man schulde rather offre vp his money in the temple, than he schulde with the same money releeue his fadir or modir hauyng nede to be releeued therbi, and whiche myȝten not be releeued saue therbi: an other tradicioun was, bi which it was ordeyned that no man schulde take mete, but that he anoon bifore waischid him, and as soone as eny man were come and turned hoom fro the market or the cheping, that he waische him silf; wherby it is open that the opi|nioun of the Iewis was this, that the bodili waisching with water schulde clense the soule fro moral vnclen|nessis drawun and takun in biyng and silling. Forwhi it nedith not neither folewith, that bi biyng and sil|ling
