mad in the bigynnyng of this present chapiter is proued.
The secunde semyng skile into the same purpos is this: Thilk thing or gouernaunce not being necessarie into oure saluacioun, as for that it is the comaunde|ment of God, what euer he be, is to be kutt awey and to be leid aside and to be not had and vsid, of which miche goostli harme and synne comen; for that that he is the occasioun that thilk goostly harme [and synne] comen; forwhi into the meenyng of this now rehercid proposicioun or sentence the Gospel seith thus: If thi riȝt iȝe or thi riȝt hond [riȝthond, MS. (conjunctim), ac|cidentally?] or thi riȝt foot sclaundre thee, pulle him out or kutte him awey and caste him fro thee: [See Matt. v. 29; Mark ix. 45.] but so it is, that of ech of the now spokun mannys lawis had and vsid myche goostli harm and synne comen, so that ech of hem is the occasioun wherbi and wherfro the goostli harme and synne comen: wherfore folewith that ech of the now spokun religiouns ouȝte be pullid out of the chirche and ouȝte be kutte awey and be not had and vsid.
The iije. semyng skile is this: If suche now spo|kun lawis and tradiciouns ben gode and profitable to Cristen men, as it is pretendid hem to be, whi or|deyned not Crist tho same lawis and tradiciouns to be had and vsid; sithen he couthe haue ordeyned tho lawis and tradiciouns, as weel as men couthen fynde hem and deuise hem; and sithen he loueth us and wilneth oure goostli profit more than we us silf willen, forwhi for oure goostli good and profite he sore laborid, suffrid, and died? Wher upon it myȝt be argued in forme thus: Crist, which was oure grettist louer and oure beest prower, ordeyned al that was best for us to haue and al that is notabili better to be had than to not be had, for ellis he hadde not be anentis us
