sithen he openli knoulechith that the yuel, of which lak of sufficience is occasioun, is gretter yuel than is the yuel, of which habundaunce of ricches is occasion. Forwhi, as he seith, the yuel, of which the lak of sufficience is occasioun, is to stele and forsake God bi ooth and so bi avisement; and the yuel, of which habundaunce of ricches is occasioun, is forto forsake [sake, MS. (first hand).] God in a liȝtnes and in a rechelesnes. And alle men witen that the former of these ij. defautis is gretter than is the secunde. Wherfore more yuel cometh of lak of ricches than of habundaunce of ricches.
For more pleyner vndirstonding to be had upon the now bifore rehercid wordis of Salamon, Prouerb. xxxe. capitulum., and forto wite what Salamon meened in hem, and forto therbi se how it is trewe that greeter yuel cometh bi lak of ricches than bi the hauyng of ricches, it is to vndirstonde and to holde that Salamon in the now seid text meened bi "sufficience" not oonli the hauour which fillith or remedieth al his lak and nede now had, but which is ther with so abiding that it schal not lasse; or ellis not so myche lasse, but that it schal alwey aftir [aftir is added in a later hand, which has made erasures in the text.] be able to fille and remedie al his lak and nede, which is for eny tyme likeli to falle. And that Salamon vndirstode thus bi the seid sufficience spokun in his text, it is open herbi; forwhi al hauour, that is lasse than is this now seid sufficience, is "beggeri" as for now or as for tyme to come, as schal appere and be open anoon [anoon is interlineated by a later hand.] aftir whanne it schal be declarid what beggeri is. Wherfore sithen Salamon preied that "beggerie schulde not falle to him," and ȝit that "he schulde haue sufficience," he muste needis vndirstonde bi suf|ficience such a thing which ledith not into beggerie,
