The repressor of over much blaming of the clergy.

For to proue the same bi Holi Scripture y procede thus: Frowhens schule we trowe this came, that so manye pseudo or false Apostlis preching for lucre weren in the chirche in tyme of the Apostlis, as of such spekith Poul and Peter and Iohun and Iudas in her Epistilis, than fro this now to be seid? Aftir that thei weren assigned bi the veri Apostlis forto preche, thei hadden no finding assigned and lymytid to hem in propre neither in comoun; bi cause the clergie in thilk daies was not endewid with vnmouable possessiouns; neither was eny posytyue lawe mad, wherbi the prechouris myȝten cleyme eny certeinte of porcioun to be ȝouun to hem of the lay peple to whom thei prechiden; but thei eten freeli ȝouun mete and drinke of hem to whom thei freli prechiden; neither thei weren so stronge in pacience and in douȝtynes that thei wolden laboure for her lijflode and contynue her preching, whanne the peple wexe vnkinde and vndeuout forto sufficiently hem fynde in necessaries, (as Poul for lijk caus and in lijk caas wrouȝte with hise hondis forto haue his lijflode to preche:) and therfore thei weren temptid and stirid and brouȝt into consent and into deede and werk for to preche bi gileful meenis, wherbi thei myȝten the more redili receyue of the peple ȝiftis in to her eese and habun|daunt fare; and therfore thei prechiden newe thingis and vntrewe thingis forto plese the peple the more; and at the laste, (for as miche as ther fore bitwixe the Apostlis and hem wexid distaunce and contrauersie, as needis muste wexe,) tho pseudo Apostilis wrouȝten persecucioun bothe priueili and openli aȝens the trewe Apostlis, and peruertiden ofte tymes myche what the trewe Apostilis hadden weel groundid, and thei turn|eden the peple ful ofte and myche forto lothee and hate the Apostilis, and forto not bileeue to [to is interlineated by a later hand.] the verry