and othere persoonis be ouerte, in the ije. seid maner, al into the avail of the vndirlingis; and not in the firste seid maner, by tyranrie into the avail oonli of the ouerers.
In lijk maner, Ecclesiastici iije. capitulum., it is writen thus, In how miche thou art greet, louȝe thou thee in alle thingis; and thou schalt fynde grace bifore God. If eny man wolde seie, that the wise man in this text entendid to teche that no man schulde bere him as an ouerer to othere, certis he ther yn accusid the wijs man amys: for as miche as the same wijs man approueth weel such ouerte in the same book, the xe. capitulum., in the bigynnyng; and also for as miche as in this same now alleggid text he impli|eth, includith, and meeneth, that he which is ouerer, and whilis he is ouerer, and berith him silf as ouerer, schulde louȝe him silf in sum other maner; as, whilis that he berith him as ouerer in outward countenaunce, he schulde louȝe him silf in inward feeling of herte. And ellis these wordis myȝten not stonde to gidere forto make a treuthe; that he which is greet, and how euer greet he is, he ouȝte louȝe him, that he fynde grace bifore God. And also ellis the wijse man schulde seie in waast, that the greet man schulde louȝe him, but if eny greet man were aboue other men. Wherfore in lijk maner whanne Crist seide, Luk xxije. capitulum., He that is grettist among ȝou be mad as ȝonger; he muste nedis meene that he allowith oon to be grettist among hem, and that he in sum other maner louȝe him as a ȝonger. Wherto ful miche accordith and helpith this maner of seiyng and writing, "be he maad as ȝonger and as a seruant;" that is to seie, "be he maad lijk to a ȝongir, and be he maad lijk to a seruaunt." [END OF VOL. I.]
