"Thi spere threwe doun hors and man," ouȝte be this: "Thou bi thi spere, as bi thin therto seruyng instrument, threwist doun hors and man." The dew vndirstonding of this speche; "Hector cometh now," is this: "Oon lijk to Hector cometh now." The dew vndirstonding of this speche; "Iohun [Iohun Baptist, MS. (first hand).] was Helie," is this: "Iohun was lijk to Helie." The dew vnder|stonding of this speche; "Crist was the corner stoon," is this: "Crist was representid and signified bi the corner stoon."
The vje. reule is this: Euen as it is alloweable me for to seie that the instrument dooth the deede, for that the man dooth thilk deede bi the instrument; so bi lijk skile it is alloweable me forto seie thus: I "preie the instrument to do the same deede," for that y preie the man to do thilk deede bi the same instrument. That this reule is trewe y proue thus: It is alloweable me to seie to the spere of this man thus: "Thou threwist doun the other man;" for that the dew meenyng and vndirstonding of this speche is this: "Thou, man, bi thi spere threwist doun the other man," (as it is open bi the ve. reule, and this meenyng and vnderstonding is alloweable as conue|nient:) but so it is, that as weel and as dewely the dew vnderstonding of this speche; "Y preie thee, O spere, throwe thou doun the othir man," is this: "Y preie thee, O man, throwe thou doun bi this spere the other man," as it is open bi the same ve. reule; and this meenyng and vndirstonding is alloweable and conuenient, as it is open bi the same ve. reule. Wherfore as weel and as alloweabili y mai seie this speche: "Y preie thee, spere, throwe doun this man," how weel and alloweabili y mai seie this speche: "I seie to thee, spere, that thou threwist
