entrid; but the feendis moveden tho ymagis, and spaken bi hem, and ful ofte left tho ymagis to be bi hem silf withoute eny feend mouer and withoute eny speker bi hem and in hem. And therfore alle the vpbreidis and alle the reproues which Holi Writ ȝeueth to the worschipers of tho ymagis (as Baruch vje. capitulum., Ysaie xliiije. capitulum., and in the Sauter, the cxiije. and the cxxxiiije. psalmes, and in manye othere placis,) were treuly ȝouun to tho ydolatrers in this sen|tence and vndirstonding, that in tho ymagis, whiche ydolatrers taken with more therto sett for her Goddis, weren noon othere spiritis thanne feendis, and that in manye tymes whanne tho ydolatrers worschipiden tho ymagis as hauyng in hem summe othere thingis, tho ymagis hadden in hem noon othere thingis than gold and siluer and the werkis of mennys hondis. And if Holi Scripture in the placis of Scripture now spokun be vndirstonde in this now bi me formed sentence, certis alle tho reprouyng and upbreiding pro|cessis vpon ydolatrers ben trewe, and alle her vpbreid|ingis mad ben iust; and that whether tho idolatrers weren hethen men or Iewis.
xvij. CHAPITER.
FORTO make bi al this proces an answere to the xije. argument it is to be seid thus: The hethen men, of which it is now seid that thei worschipiden ymagis for her Goddis, diden so and camen into thilk greet synne of ydolatrie, bi cause thei neuer receyueden the feith which othere men (not being ydolatrers) in tho same daies receyueden: but tho hethen men trustiden as into al her reule to the doom of resoun, and wolden not seche aftir forto attende to the euydencis whiche thei myȝten bi doom of re|soun
