more assignable to be propre into this witnessing and denouncing than is an other miracle doable of God and bi the same ymage; (but alle kindis of myraclis seruen therto riȝt weel and as it were lijk weel, and namelich the myracle of sweting and of movyng or walking or of turnyng the iȝen and the myracle of speking seruen lijk conuenientli to the seid wit|nessing or denouncing, as othere miracles schulden therto serue:)—it folewith to be trewe, that (for this eende and entent of schewing and denouncing and witnessing, that God chesith this ymage of stoon or tree or of metal bifore othere like ymagis into the seid office spokun in the iiije. and ve. reulis,) it is not inconuenient but it is conuenient ynowȝ that God at sumwhile make thilk ymage swete, and that the ymage be moued from oon place into an other place with oute mannys labour, and that the iȝen of the ymage be turned hidirward and thidirward, and that the ymage semyngli speke, that is to seie, that speche and soun be mad in the ymage bi an aungel of God, as it was doon in the asse of Balaam, Numer. xxije. capitulum. And ferthermore herof, if it be not inconuenient these thingis to be doon in ymagis bi God, it is not inconuenient the seers and the next heerers of these thingis so doon forto knowe and wite and witnesse that thei ben so doon; and it is not inconuenient othere men trowe vndoutabili the same thingis as doon, whanne thei heeren credible seers and next heerers reporte and telle what thei presentli sien and herden so doon.
The vije. reule or supposicioun is this: Whi and wherfore God chesith this place more than an other certein place, and wole do miraclis in oon such place and bifore sum such seid ymage more than in an other place and than bifore another lijk ymage, is not of men to be enquerid. Forwhi, that God chesith oon place more than an other and oon ymage more than
