and iustified her dede ther yn, as it is open Math. xxviije. capitulum., whanne he seide, "that sche dide a good werk into him; and that where euer in the world schulde be prechid thilk gospel, it schulde be seid that sche dide it into the mynde of him, and that sche dide it into the biriyng of him," and so forth, as y haue write herof more pleinly in dyuerse placis. Wherfore this ve. conclusioun is trewe.
Also this present ve. conclusioun is proued vnsoila|bili bi a proof mad bifore in the firste parti of this present book, the [xixe.] [A space left in the MS. for the number.] chapiter, bi setting forth of iij. reulis and thanne bi taking [bitaking, MS.] of iiij. conclusiouns there formed upon hem. Se there the proof who euer wole.
viij. CHAPITER.
THE vje. conclusioun is this: Doom of weel disposid resoun allowith and approueth that pilgrimagis be doon. This conclusioun y schal proue bi setting and sending bifore of open reulis and supposiciouns, and bi from hem falling doun into special proof of this present conclusioun.
The firste reule or supposicioun is this: The holi lijf and passioun of Iesus Crist was to alle Cristen a passing greet benefet: the ȝiftis of gracis, the glo|ries of heuen bihiȝt ben to alle Cristene passyng greete benefetis: the holi lijf and conuersacioun of ech Seint is to alle Cristen a greet benefet of God ȝouun to hem. The dignite and worthines of God, his loue, and his riȝtwisnes ben ful worthi and re|uerend, gode, and preciose. And alle these now bifore
