book, and in the firste parti of the book clepid The iust apprising of Holi Scripture; but so it is, that resoun biddith or counseilith or allowith and approueth ymagis to be had and to be vsid in the maner oft bifore seid, as it is open by the vij. next bifore going principal conclusiouns; ȝhe, and Holi Scripture the same allowith, [allowith and approueth, MS. (first hand).] as it is open bi the ve. next bifore going conclusion. Wherfore to haue and vse ymagis in the maner now seid is approued and al|lowid of God as for a point of his moral lawe and of his plesaunt seruice.
The ixe. principal conclusioun is this: It is not synne a man bi hise werkis forto ensaumple to othere men, that thei haue and vse ymagis in the maner bifore tauȝt; and that thei do as he dooth, if he do in the maner bifore tauȝt; but it is a merytorie and a weel doon dede for to it [it is interlineated, perhaps by a later hand.] so ensaumple. That this conclusioun is trewe, y proue thus: It is not synne a man bi hise werkis forto ensaumple to othere men, that thei do a deede and a point of Goddis moral lawe and of his plesaunt seruice; but it is a mery|torie deede for to it ensaumple to othere. And her|with so it is, that forto vse ymagis in the maner bifore tauȝt is a deede of Goddis moral lawe and of his plesaunt seruice, as it is proued weel bi the next bifore going conclusioun. Wherfore it is not synne a man forto ȝiue ensaumple to othere men that thei vse ymagis in the maner bifore tauȝt, as bokis to hem; but it is a merytorie deede forto ȝeue thilk ensaumple. And so this present ixe. conclusioun is to be holde trewe.
