in the resoun of him which redith and vndir|stondith there the Scripture. Forwhi in this case thilk gouernaunce schulde be grondid or witnessid sumwhat and in parcel bi tho proposiciouns caste to Scripture, as it is groundid and witnessid sumwhat and in parcel bi the Scripture; but so it is, that noon of these now bifore spokun and rehercid gouernauncis may be knowe to be trewe, iust, and riȝtful bi eny text or processe in Scripture aloone, whilis no more at al in resoun is sett to the same Scripture, for to conclude the seid gouernance bi the Scripture and bi resoun to gidere. Wherfore noon of alle these seid gouernauncis is groundid or witnessid expresseli in Holi Scripture.
Confirmacioun herto is this: No thing is expressid or expresseli witnessid or groundid in Holi Scripture, which is not rehercid in Holi Scripture; but so it is, that noon of these gouernauncis is rehercid in Holi Scripture: wherfore noon of hem is expressid in Holi Scripture. And if noon of hem is there expressid, certis noon of hem is there expresseli groundid, wit|nessid, or denouncid, or tauȝt. Also thus: Oonli it is expressid or expresseli toold and tauȝt in Holi Scripture, which is knowun for trewe or to be doon, thouȝ no thing ellis in [in is interlineated by a later (?) hand, and doom written on an erasure.] doom of resoun be sett ther to; but so is not of eny of the bifore rehercid gouer|nauncis: wherfore noon of hem is expressid or expres|seli toold, or tauȝt, witnessid, rehercid, or groundid in Holi Scripture.
Now, Sir, to thee thus: In caas that y wolde holde aȝens thee, and seie that it is not to be do, that ale and beer be mad and drunke; or that wommen weere couerchefis of lynnen or of silk, of whiche so miche synne cometh; or if y wolde holde that it were not Goddis seruice forto at sum while lauȝe or make
