aȝens the keping of Goddis moral lawe; and thei hem silf knoulechen that these dedis ben grete synnes and aȝens Goddis lawe. And ȝit thei weenen and holden hem silf for to haue the trewe and dewe vndir|stonding of Holi Scripture; ȝhe, that no men han bettir the trewe vndirstonding ther of than thei han. Wherfore needis folewith that thei hem silf muste holde the seid iiije. opinioun to be vntrewe, and that for open knowing of experience which is had among hem silf of these now bifore rehercid vicis, and of many othere vicis. And therfore fro this dai forth ward y hope noon holder of the iiije. opinioun schal mowe for schame holde the same iiije. opinioun, but rather he schal be schamed that he hath it bifore so vngroundabili holde, and withoute suficient evidence therto bifore had he hath so faste therto cleued and lened. Ferthermore y dare weel seie, if alle the evi|dencis whiche ben late bifore writun in the next chapiter, aȝens the ije. opinioun be weel considerid thei schulen suffice forto vnprove this iiije. opinioun here, as thei vnproven the ije. opinioun there. And therfore more than this no nede is forto write now and here aȝens the seid iiije. opinioun.
Tho iij. textis of Holi Scripture, whiche bifore in this present chapiter ben alleggid into the grounding of this iiije. opinioun, availen not therto. Forwhi, lijk wise as bifore (in the eende of the ixe. chapiter in this present ie. partie) to ij. textis of Holi Scripture brouȝt forth into helping of the firste opinioun y haue answerid there, that tho ij. textis speken of leernyng and kunnyng which is feith, and not which is had bi doom of resoun in lawe of kinde; so y answere now to these iij. textis brouȝt forth in this present chapiter for grounding of the iiije. opinioun, that ech of these iij. textis spekith of leernyng and knowing which is feith, namelich vpon Cristis Persoon and upon his Incarnacioun, and not of leernyng and
