Writt techith articlis of feith as ellis where. And here y make an eende of my answeris ȝouun to the ij. bifore rehercid obiecciouns.
xvj. CHAPITER.
IN whiche answeris thouȝ y haue write or seid more than wole anoon accorde with the capacite of the Bible men, to whom and aȝens whom this book is principaly maad, ȝit y haue leefir so do than forto seie and write lasse; lest therbi schulde seeme to hem, that sufficient answere couthe not be ȝouun to her seid ij. obiec|ciouns; and lest that ellis thei myȝten trowe, that bi her powring in the Bible aloon thei miȝten leerne for to assoile sufficientli alle obiecciouns biholding the Bible, thouȝ thei hadden no counseil of substancial clerkis weel leerned in logik and in moral philsophie. And ther fore of oon thing y warne al the world, which is this. If substanciali leerned clerkis in logik and in moral philsophie and in dyvynyte, and ripeli exer|cisid ther yn, weren not and schulden not be forto wiseli and dewli ȝeue trewe vndirstondingis and ex|posiciouns to textis of Holi Scripture: or ellis, thouȝ suche clerkis ben, and the lay parti wolen not attende to the doctrine, whiche tho clerkis mowe and wolen (bi proof of sufficient and open euydence) mynystre to the lay parti; but the lay parti wolen attende and truste to her owne wittis, and wolen lene to textis of the Bible oonli, y dare weel seie so many dyuerse opinions schulden [schulde, MS. (first hand).] rise in lay mennys wittis bi oc|casioun of textis in Holy Scripture aboute mennys moral conuersacioun, that al the world schulde be cumbrid therwith, and men schulden accorde to gi|dere in keping her seruice to God, as doggis doon
