Seie to me also where in Holi Scripture is ȝouen the hundrid parti of the teching which is ȝouen upon vsure in the thridde parti of the book yclepid The filling of the iiij. tablis: and ȝit al thilk hool teching ȝouen upon vsure in the now named book is litil ynouȝ or ouer litle forto leerne, knowe, and haue sufficientli into mannis bihoue and into Goddis trewe seruice and lawe keping what is to be leerned and kunnen aboute vsure, as to reeders and studiers ther yn it muste needis be open.
Is ther eny more writen of vsure in al the Newe Testament saue this, Luk vje. capitulum., Ȝeue ȝe loone, hoping no thing ther of? and al that is of vsure writen in the Oold Testament fauorith rather vsure than it re|proueth. How euere, therfore, schulde eny man seie that the sufficient leernyng and kunnyng of vsure or of the vertu contrarie to vsure is groundid in Holi Scripture? How euere schal thilk litil now rehercid clausul, Luk vje. capitulum., be sufficient forto answere and assoile alle the harde scrupulose doutis and questiouns which al dai han neede to be assoilid in mennis bar|genyngis and cheffaringis to gidere? Ech man having to do with suche questiouns mai soone se that Holi Writt ȝeueth litil or noon liȝt therto at al. For|whi al that Holi Writt seith ther to is that he for|bedith vsure, and therfore al that mai be take therbi is this, that vsure is vnleeful; but thouȝ y bileeue herbi that vsure is vnleeful, how schal y wite herbi what vsure is, that y be waar forto not do it, and whanne in a bargeyn is vsure thouȝ to summen seemeth noon, and how in a bargeyn is noon vsure thouȝ to summen ther semeth to be? And also thouȝ Holi Scripture bidde that we tempte not God amys and aȝens resoun, certis resoun techith the same. But ȝit where ellis than in doom of resoun schule [schulde, MS. (first hand).] we fynde what tempting is, and which tempting of God
