firste is this: It longith not to Holi Scripture, neither it is his office into which God hath him ordeyned, neither it is his part forto grounde eny gouernaunce or deede or seruice of God, or eny lawe of God, or eny trouthe which mannis resoun bi nature may fynde, leerne, and knowe.
That this conclusioun is trewe, y proue thus: What|euer thing is ordeyned (and namelich bi God) for to be ground and fundament of eny vertu or of eny gouer|naunce or deede or treuth, thilk same thing muste so teche and declare and seie out and ȝeue forth al the kunnyng vpon the same vertu or gouernance or trouthe, wher with and wherbi thilk same vertu, gouernaunce, or trouthe is sufficientli knowen, that withoute thilk same thing the same kunnyng of thilk same vertu, gouer|naunce, or trouthe may not be sufficientli knowen, so that thilk same vertu, gouernance, or trouthe, in al the kunnyng withoute which he may not at fulle be leerned and knowen, muste nedis growe forth and come forth out and fro oonli thilk thing which is seid and holden to be ther of the ground and the fundament, as anoon aftir schal be proued: but so it is, that of no vertu, gouernaunce, or treuthe of Goddis moral lawe and seruice, into whos fynding, leerning, and knowing mannis witt may by his natural strengthe and natural helpis come, Holi Scripture al oon ȝeueth the sufficient kunnyng; neither fro and out of Holi Scripture al oon, whether he be take for the Newe Testament al oon, or for the Newe Testament and the Oold to gidere, as anoon after schal be proued, growith forth and cometh forth al the knowing which is nedeful to be had upon it: wherfore nedis folewith, that of no vertu or go|uernaunce or trouthe into which the doom of mannis resoun may sufficientli ascende and come to, for to it fynde, leerne, and knowe withoute reuelacioun fro God mad ther vpon, is groundid in Holi Scripture.
The firste premisse of this argument muste needis be grauntid. Forwhi, if the sufficient leernyng and
