Þider cumeþ þe saulen ilome.
Þat her demde false domes.
Mo saulen. þolieþ þer swich wo.
Þene fysses swimme oþer fueles go.
Line 64
Heo gredeþ lude and wepeþ sore.
Ac bóte. ne tyd heom neuer more.
A hwel of stele is furþer mo.
And berneþ lihte and turneþ o.
Line 68
A þusend spoken beoþ þer-on.
And pykes ouer al idon.
Þer schule þe saulen beo to-drawe.
Þat her arereden vnryhte lawe.
Line 72
Mo saulen þolieþ þer sucche wowe.
Þane be floþre in þe snowe.
Fvrþer þer is a water wallinde hot.
Þat is. deop. and long. and brod.
Line 76
Blakkure þan þe swarte pich.
And stynkeþ so for-holde lych.
Of vych a wrm þat atter bereþ.
Oþer hit stingeþ oþer hit tereþ
Line 80
Ifulled is þat fule pool
Þat euer is hot. and neuer cool.
Bisydes stondeþ an feondes trume.
And wayteþ hwenne þe saules cume.
Line 84
Heo hire a-warieþ al aþrep.
Al so wulues doþ þe scep. [folio 272:1]
Hwenne þe feondes heom for-leteþ.
Snaken and neddren heom imeteþ.
Line 88
And dreyeþ heom in-to a wel.
Þer heo þolyeþ al vn-sel.
Hwenne heo habbeþ so i-don.
Eft hit beoþ heom al fornon.
Line 92
Ne may he segge. waylawei.
Þat so schule pynen nyht. and day.
Summe me may þer iseon.
Þat stondeþ vp to heore kneon.
Line 96
