For as the firste off alle lettres ys the A, [folio 87a]
Line 52
So Artow firste Modir of alle vertue.
Off myn vnkunnynge, swete lady, now Rewe;
And thouhe vntauhte I speke of governaunce,
Withe thy swete helpe supporte myn ygnor|aunce.
Line 56
A, Bele Babees, herkne now to my lore!
Whenne yee entre into your lordis place,
Say first, "god spede;" And alle that ben by|fore
Yow in this stede, salue withe humble Face;
Line 60
Stert nat Rudely; komme Inne an esy pace;
Holde vp youre heede, and knele but on oone kne
To youre sovereyne or lorde, whedir he be.
¶ And yf they speke withe you at youre komynge,
Line 64
Withe stable Eye loke vpone theym Rihte,
To theyre tales and yeve yee goode herynge
Whils they haue seyde; loke eke withe your myhte
Yee Iangle nouhte, also caste nouhte your syhte
Line 68
Aboute the hovs, but take to theym entent
Withe blythe vysage, and spiryt diligent.
¶ Whenne yee Answere or speke, yee shulle be purveyde
What yee shalle say / speke eke thing fructuous;
Line 72
On esy wyse latte thy Resone be sayde
In wordes gentylle and also compendious, [folio 87b]
For many wordes ben rihte Tedious
To ylke wyseman that shalle yeve audience;
Line 76
Thaym to eschewe therfore doo diligence.
