About 1270. Grant to Godstow, by Henry of Edmunds|thorp, of 2 acres.
THE sentence of þys chartur is, that henry of Edmundisthrop gaf, grauntid, & confirmid with hys wrytynge, to god & to the churche of seynt Iohn baptist of Godestowe, & to the Abbas & couent brethyrn & systyrn of þe same place þer seruynge god, in-to pur & perpetuell almis, for þe saluacion of hys sowle & of Isabel hys wyfe & for þe saluacion of þe sowlis of all hys aunceturs & successours, ij. acris of londe the whyche lyen in the feeldys of kynges Clere, of þe whyche on acre lyeth in the west feelde at hellenestubbe, by-twene the londe þat was of henry Coke & þe londe þat was of william Cnoll; & an-oþer acre lythe in þe feelde in þe tilthe þat is callid burnefurlonge, in þe northe parte of þe londe þat was of Iohn scut, & strecchyth hyt-sylfe fro þe west towarde þe est vn-to woluethelynge, & þat acre is callid krockeresacre. The fore-seyde henry grauntyd þe seyde ij. acris of londe, with here pertinences, to be had & to be holde of hym & of hys heyrys, to þe seyde holy churche of seynt Iohn baptiste of Godestowe, to þe Abbas brethyrn & systryn of þe seyde holy hous, well & in peece, freely & quietly, hole & herytably for euyr; & þe seyde henry & hys heyrys warantiȝyd & acquited & defendyd þe seyde ij. acris of londe, with all here pertinences, to þe seyde holy church Abbas & couent brethryn and systryn of þe seyde holy hows & to her successours for euyr, a-geynyst all pepull: & þat hys gyft graunt & confirmacion myht be stronge & sure for euyr, [folio XXII(33)] he strengthyd hyt with þe puttyng to of hys seele.
About 1280. Grant to Godstow, by John franklin, of 'Prevet Croft,' quit-rent, 1d., in exchange for 6 acres in 'the Breche.'
THE sentence of thys chartur is, þat Iohn frankeleyne gaf, grauntyd, & confirmyd with hys wrytynge, to royse Abbas of Godestowe & to her couent, a crofte of hys londe of þe fee of frollebury, þe whyche is callyd preuet crofte, & buttythe in length toward þe west vppon þe londe of þe seyde abbas & towarde þe est vppon þe londe of þe person of þe churche of wolfrynton, & it lieth in brede by-twene the londe of þe seyde Abbas of þe sowthe partye & the londe of william at groue vppon þe northe syde. Alle þe fore-seyde crofte, with all his
