(46)
¶ And Pilgrymes gret plente
þat wolden passen ouer þe Cee,
To tars þat wolden ȝare.
Line 543
He bad þe shipman, for goddes loue
þat is in heuene vs aboue,
he most wiþ hem fare.
Line 546
Grete grucchyng þai alle made;
Alexius fer & ner gan wade,
ffor nouȝth wolde he spare;
Line 549
Euere he cried loude & shille,
Til þai graunted hym his wille,
þoo was he out of care.
Line 552
(47)
¶ þai drowen vp seil, þe wynde was good,
And saileden ouer þe salt flood,
þe weder was at her wille;
Line 555
vntil, þe þrid dayes ende,
Swiche a storme Iesus gan sende,
þat alle hem liked ille.
Line 558
þai wenden wel haue went to tars;
þe wynde was gret, & noþing skars,
þonder dyned shille;
Line 561
ffor liȝttynges grete, & þonder blast,
wel sore þe poeple was agast,
þai grete & groned grille.
Line 564
(48)
¶ þe wynde hem droof, forsoþe to seyne,
In-to þe londe of Romeyne,
þere Alexius was borne;
Line 567
þoo was þe poeple in wel more care,
ffor þat þai were aryued þare,
þan þai weren er biforne;
Line 570
ffor þat tyme were þe folk of Rome
þe mest shrewen of cristendome
wiþouten oþes ysworne.
Line 573
ffor pilgrymes þat aryueden þere,
her catel þat þai wiþ hem bere,
On hast was forlorne.
Line 576
