"Louerd, merci," seide þe givȝ : "to soþe nouþe ich i-seo
Þat cristinemannes god is muche and guod : betere [al. herre] ne may non beo.
doth mid me ȝwat ȝe wollez : of-serued ich habbe i-wis:
For a rode ich smot a swiþe deop wounde : and heo bledde on me þis.
And ich eov bidde cristine-dom : are ich beo to deþe i-do."
Cristine men þat þis i-heorden : ful sone huy ȝeoden him to,
Line 540
Of þat þe giv heom tolde : huy maden heom ful bold: [folio 29]
huy wenden forth and founden þe Rode : ase [he] heom hadde i-told.
huy wuschen hire clene and setten hire up : ase heo was er bi-fore ido.
Ȝuyt is þe wounde in þe þrote i-sene : and euere heo wole so.
Line 544
Þe giv þat hire hadde so i-smite : i-cristned he was sone,
And guod lijf ladde, as it bi-feol : cristine man to done.
A Cristine man þare was ȝwile : in þe londe of Sicie,
A rode he hadde in is hous : þer-on ofte to crie.
Line 548
hit bifeol at is terme-day : þat he wende to an oþur inne.
A giv cam sethþe and wonede þer : and nust nouȝt þe rode þare-inne.
Þo þe rode was þare i-founde : alle þe giwes as nome
And ladden as forth to heore Synagogue : ase huy ladden ore louerd to dome;
Line 552
And also ase huy ore louerd beoten : þe rode huy beoten faste,
And spatten on hure and boffatteden al-so : and ofte a-doun hire casten;
At þe riȝt side huy smiten a spere : ful deope in atþe laste:
Þat blod sprong out with gret strem. : þo weren þe schrewes a-gaste.
Line 556
For huy nolden bi-blede heore synagogue : a gret fat and a muche huy fette,
to hente þane strem of blode : vnder þe rode huy it sette;
So þat heo bledde þat fat bretful : of blod, are hit stunte.
þo ne dorsten huy more schame do : þe rode ase huy munte.
Line 560
Ake huy þouȝten to proui with þat blod : ȝweþer ore louerd were soth and guod [r. soth god] :
Euerech sik giv þat huy kneowen : huy smeoreden with þat blod:
And heore hele huy hadden a-non. : þe schrewene onder-stode
þat heore lawe nas riȝt nouȝt : þat ne bi-liefden nouȝt on þe rode:
Line 564
to þe bischop huy wenden a-non : and lieten heom cristni alle,
And tolden al heore luyþere dede : ant hou it þare-of was bi-falle.
Þe bischop wuste þis holie blod : ase relikes riche and guode.
