Þat huy bi-twene heom-seoluen tweine : þe bataille scholden do
And al heore Ost stonden and bi-holde : and non ne come hem to;
Ȝweþur of heom a-boue were : habbe scholde þe miȝte
Of þe oþeres men and al is lond : aftur is wille it diȝte.
Line 436
Þo þis foreward was i-mad : to-gadere huy smiten to grounde
And fouȝten ase hit heore riȝte was : and maden heom wel bitere woundes.
Atþe laste þe Aumperour : þane oþerne ouer-cam,
And al his folk, ase foreward was : into his power [al. baundoun] heom nam.
Line 440
he liet heom cristni euer-ech-one : and siwi him to is wille.
Þe luþere king sat euere at hom : in his heouene wel stille
Ase a god, and nuste nouȝt : þat he was bi-neþe i-brouȝt;
So vuele he was of his men bi-loued : þat huy nolden him telle nouȝt.
Þis Aumperour wende him forth : in-to his heouene an heiȝ
And fond him sitten þare ase a god : his sone him sat ful neiȝ.
Line 446
"Ille hail beo þou, false god : in þine false heouene i-founde,
With þi sone and þi holie gost! : ȝe beoth neiȝ a-swounde.
Line 448
bi him þat þou countrefetest : þat for us þolede wounde,
bote þou wolle on him bi-lieue : þou schalt here in a stounde
Of mine hondene þolie deth : and þi pruyte i-brouȝt to grounde, [folio 28]
For al þine heouene i-nelle bi-leue : for marke ne for pounde."
Line 452
"Nay certes," þis oþur seide : "þou ne schalt me so nouȝt lere
Þat ich to anie manne a-bouwie schulle : bote he herre þane ich were."
Þe Aumperour drouȝ out is swerd : and smot of is heued riȝt þere.
his ȝongue sone þat sat bi him : þat was in his teoþe ȝere,
Line 456
he liet cristny and maken him king : of al is fader lond.
his men he ȝaf [MS. ȝat] al þat seoluer : þat he þere fond.
Mid þat gold and þe riche þingues : þat he fond al-so þere
Þe churchene þat þe schrewes destruyden er : þare-with he liet a-rere,
And made þare a lond wel bi-lieued : and guod in godes lawe;
Alle þat nolden tuyrne to god : he brouȝte sone of dawe.
Line 462
Þe holie croiz þat he fond þere : þat ore louerd was on i-do,
A-doun he as nam with gret honour : and with him as ladde also
Line 464
To þe boruȝ of Ierusalem. : and þo he cam þare-bi-side,
Opon þe hulle of Oliuete : one stounde he gan a-bide.
