In þulke stat huy stoden longue þare : and euere-more grene,
A-non for-to Moyses þe profete : ȝeode þare in londe,
to lede þat folk of Israel. : and þo he fond þe ȝerdene stonde,
Line 232
"lo here," he seide, "gret bi-tokningue : of þe holie trinite,
Of fader and sone and holie gost : bi þeose ȝeorde þreo."
he tok hem op with gret honour : and in faire cloþe heom wond—
A suote smul þare cam of heom : þat smelde in-to Al þat lond.
Line 236
to confermi þe bet is lawe : he bar heom forth on is hond;
Ech sick man þat heom A-nourede : is hele a-non he fond.
to techen is folk þe riȝte lawe : þe ȝeordene with him he ber,
And for-to hele sike men : to and fourti ȝer.
Line 240
Sethþe þo he deiȝe scholde : þe ȝeordene he sette er
Onder þe hulle of Tabor : and deide him-suluen þer.
Þare stoden þis ȝeordene grene : more þane a þousend ȝer,
Forto seint Daui þe kyng cam : þat was of so gret power.
Line 244
So þat he was þoruȝ þe holie gost : i-hote forto hiȝe
To þe hulle of Tabor : in þe londe of Arabie,
And þat he þulke ȝeordene þreo : fette and with him nome.
Nie dawes he was þuder-ward : are he þudere come.
Line 248
With gret honur he nam heom op : þo he þe ȝeordene [MS. ȝeordere] fond—
Þe swotnesse þat þarof cam : fulde al þat lond.
With grete melodie of is harpe : seint Daui þe ȝeordene nam
And ladde heom to Ierusalem : þene Nynþe day hom he cam.
Line 252
In a priue stude he heom sette : ase it was in þe eueningue,
For-to a-morewe, þat he i-seiȝe : ȝwodere he miȝte heom bet bringue.
A-Morewe, þo he cam þer-to : to one huy weren alle i-come,
and weren i-morede suyþe faste : þat huy ne miȝten beo op i-nome.
Line 256
Þat huy weren so alle to one i-woxe : ȝwat bi-toknede þis
bote þe fader and sone and þe holie gost : þat al o god it is?
Seint Daui a-boute þis holie ȝeorde : a strong wal he liet a-rere,
And nam guode ȝeme hov longue it woxe : fram ȝere to ȝere:
Line 260
With a beiȝ of seoluer he bond : eche ȝeres schute þere,
Þat he miȝte atþe laste i-wite : hou old þat treo were.
So þat with-Inne þritti ȝer : þis treo wax wel on heiȝ;
hit ne wax þo none more : and [r. ase] he wust wel bi þe seluerne beiȝ;
Line 264
