"louerd," huy seiden, "ȝweþer þis beo soth : þat we i-heorez nouþe telle,
oþur us þinchez ase in metingue : oþur in manere of spelle?"
Line 208
"hit is soth," seint peter seide : "oþur me þinchez ȝe beoth wode."
huy nusten ȝweþur to beon stille oþur speke : bote ase gydie men huy stode.
¶ "Louerd," huy seiden, "here is ore Moder : þat a-dreint was ase we wende,
I-hered he beo þat hire hath to liue i-brouȝt : And þat hire to us sende!
Line 212
And þis is Clement, ore ȝongue broþur : þat longue hath i-beo ore fere;
Nuste we neuere er ȝwat he was : are þoruȝ godes grace nouþe here."
Louerd, þe Ioye þat þe[re] was : And þat manie Miȝten i-seo,
bi-twene þe guode wyf and hire sones : þe swete breþren þreo!
Line 216
ÞIs guode wyf axede hire tweye sones : hov huy to liue come.
"Dame," huy seiden, "ase god it wolde : a bord of þe schype we nome
And þar-on we hienguen, and hit bar us forth : into þe se wel wide.
Marineres us token into heore schipe : ase we floten heom bi-side.
Are huy us hadden to londe i-brouȝt : huy nolden neuere a-fine.
Line 221
To Ane holie wydewe huy solden us : þat hiet dame Iustine;
Þat us lokede nesche I-novȝ : as þei we hire sones were,
And, god ȝielde it hire! of clergie : heo liet us sone lere.
Line 224
So þat we beoth nouþe godes desciples : and with his Apostle here.
Ore broþur clement we knoweth nouþe furst : þat ȝare hath i-beon ore fere.
And nouþe we beoth here to-gadere come : we mowen i-seo godes miȝte,
Þat euere wole mannes ȝwyle ȝelde : þat seruez him with riȝte."
Line 228
Ech man wot wel þat þis I-heorth : þey we ne seggen it i-lome,
gret Ioye bi-twene heom alle was : þo huy to-gadere come.
¶ þis guode wyf heom tolde of hire hostesse : þat Innede hire bi nyȝte,
Þat heo was a guod womman and was bedrade : ȝif huy hire hele miȝten.
Line 232
